Lingua madre. Capsule per il futuro.

Analisi Logica –Riccardo Favaro (text), Fabio Condemi (reschia)
Other Lands – curatà da Paola Tripoli

«Nus ans imaginain gia uss in mund, en il qual noss corps n'existan betg pli. Il computer vegn ad esser nossa memoria. Nus ans sentin sco perditgas d'ina fin: Tenor nus èsi necessari ch'il teater e la tecnica restian en in dialog, per ch'ils rituals da la fin sajan vegnids analisads per in'eventuala resurrecziun.»

Il mund sco quai che nus enconuschevan el è rut dapart en la crisa da corona ed il teater è vegnì condemnà a taschair precis en quel temp che nus al avessan duvrà pli che mai. Quest connex sventirà da malsogna e publicitad/reuniun è stà ina da las experientschas las pli dolurusas per tut quellas e quels che vivan per e dal teater. Profund en nus avevan nus teatristas e teatrists la tema da laschar la societad a mesa via en il mument decisiv. Cun in tschert retard èn ins s'orientà da nov. Numerus teaters e bleras cumpagnias che han l'entschatta refusà la transmissiun digitala, il streaming e l'emissiun davent da chasa èn la finala tuttina sa decidids per questas tecnicas. Mintgatant èn ils resultats era stads surprendentamain divertents.

Il LAC Lugano Arte e Cultura n'ha betg vulì sa suttametter a quest dictat. E tuttina ha era questa instituziun da teater giuvna stuì sa far la dumonda co ch'ella possia nizzegiar cun responsabladad quest «temp mort». Ella ha dentant refusà da considerar pussaivladads digitalas sco remplazzament valabel per eveniments en directa. Ins ha vulì nizzegiar en in'autra moda las forzas intellectualas ed artisticas da las artistas e dals artists stgatschads giu da tribuna. Carmelo Rifici, directur dal LAC, e Paola Tripoli, manadra artistica dal festival internaziunal FIT a Lugano, han perquai fundà ina rait da las artistas e dals artists dal LAC cun il num «Lingua Madre». La finamira da la rait è stada da ponderar e crear da cuminanza – cun agid da la tecnica e per la tecnica, betg en ses servetsch. «In pact cun la tecnica sto esser in pact da savida e betg in pact da consum», han els formulà. Uschia è naschì il project digital da pliras parts «Lingua Madre. Capsule per il futuro.» – ina sort da rizom artistic cun las pli differentas furmas d'expressiun e connexs subcutans, dentant senza structura lineara u limitada. Il project sa cumpona da reflexiuns en scrit, films, contribuziuns audio, referats e maletgs sco era da material resultà en il process.

Da quest grondius construct che crescha vinavant e che enzuglia las preschentaziuns che han ussa puspè lieu en directa sco era variaziuns digitalas mussain nus dus projects en il rom da l'Inscunter dal teater svizzer: il film «Analisi Logica» da Riccardo Favaro (text) e Fabio Condemi (reschia) sco er il project cun pliras parts «Other Lands», curatà da Paola Tripoli. Quel sa basa sin il princip da laschar vegnir a pled quellas e quels ch'ins ha fatg taschair.

Scuvri las differentas stresas dad «Other Lands» che mainan Vus en l'Africa dal Sid, l'Egipta, en Palestina ed en Pologna. Tut tenor pajais datti en l'installaziun digitala chartas geograficas interactivas cun contribuziuns audio, texts da profundaziun e films curts. Il spazi da reflexiun poetic dal film «Analisi Logica» s'occupa en spezial cun l'analisa linguistica, ma sco en in siemi dastg'ins sa perder cumplettamain per in mument.

(Julie Paucker, direcziun artistica)

• distrib

  In concept da
  Carmelo Rifici
  Paola Tripoli

  Redaktionsausschuss
  Lorenzo Conti
  Angela Dematté
  Riccardo Favaro
  Francesca Sangalli

  Verantwortliche Redaktion
  Silvia Pacciarini

  Chef Recherche
  Isabella Lenzo Massei

  Koordination
  Maria Fico
  Massimo Monaci

  Produktion Video
  Associazione REC
  Adriano Schrade, REC
  Olmo Cerri, REC
  Igor Samperi, LAC
  Anna Domenigoni, LAC

  Bildinhalte Foto/Video
  Anna Domenigoni, LAC
  Irene Masdonati, LAC

  Technische Leitung
  Pierfranco Sofia

  Produktion
  LAC Lugano Arte e Cultura

• link