Dr Churz, dr Schlungg und dr Böös

Dus umens en in'arena, il public en in rudè enturn els. Tensiun, concentraziun e prontadad da cumbatter, ma nagina ostilitad. Ins exercitescha, umens vi da la lavur. Nus observain, savurain il suaditsch, tadlain ils schems, survegnin said ed ans dumandain, nua che la seriusadad cumenza ed il plaschair finescha. Amicizia, fairness e loialitad, cumparegliar tschivlots ed agressiun, cumbinà cun admiraziun e vulnerabladad – la proximitad mintgatant memia gronda durant la branclada sveglia sentiments da malesser e penibladad. U sa porscha en quest lieu simplamain la pussaivladad da crear in'autra furma da relaziun e da corporalitad?

In toc sco fatg per l'Inscunter dal teater svizzer: perquai ch'el tracta in usit originar svizzer, per betg dir: in sport naziunal, ma è tuttina dal tuttafatg teater. Il «Hoselupf» sco pas de deux, quell'idea ston ins l'emprim avair. Insumma va il teater da preschent gugent sur ses cunfins: quels dal teater recitativ, corporal e sautà d'ina vart, e quels dals geners linguistic-textuals da l'autra vart. Elements documentars s'uneschan cun elements ficziunals, ed il text classic sa maschaida cun lingua actuala che para bainduras spontana. Quai vala era per la lavur da la sautunza e coreografa giuvna Johanna Heusser da Basilea che sa mova cun sias lavurs insanua tranter il saut ed il teater. Cun questa saira s'avischina ella ad in champ ch'era l'emprim ester ad ella e connotà cun sceptica. In sport che festivescha moviments extremamain masculin-patriarcals, e quai en ina moda patriotica. Malgrà che quai ha da far nunditg pauc cun la vista dal mund e la chapientscha da las rollas da l'artista, pari ch'igl haja dà in'avischinaziun en quel reguard. Quai che vegn numnadamain preschentà quella saira è vaira divertent e dapli che mo critica.  

Sco aspectura u aspectatur reflectesch'ins bler viaden en quest pèr lutgant. Franc èn ils geners da relaziun tranter ils umens sa midads dapi l'invenziun da la lutga, forsa schizunt sa deliberads. Almain sco laic dal Swiss Wrestling vegn ins adina pli malsegir, schebain la diversitad, l'esser different, sa zuppa forsa gia en questa pli curiusa disciplina da tuttas?

Tge ch'è sper ils elements universals tipicamain svizzer vi da tut quai, gliez pudais Vus scuvrir sez e discutar suenter la represchentaziun cun las performras ed ils performers. E tgi che n'ha suenter quest teater sautà nagin resgim vi da las chautschas u vi da l'ur da la rassa, ha definitivamain fatg fallà insatge.

(Julie Paucker, direcziun artistica)

• distrib

  Concept e Choreografia
  Johanna Sofia Heusser

  Performer
  Dennis Freischlad, David Speiser

  Dramaturgia
  Fiona Schreier

  Tribuna, glisch e tun
  Marc Vilanova

  Glisch e video
  Robert Meyer

  Costums
  Diana Ammann

  Oeil Exterieur
  Selina Beghetto, Stephan Stock

  Coaching
  Stefan Aebi                                                        

  Administraziun
  Catalina Schriber

  Mentorat
  Regine Schaub Fritschi

  Producziun
  Verein Landholz

  Coproducziun
  ROXY Birsfelden, Hochschule der Künste Bern - HKB

• link