selection
Martin Zimmermann na ston ins atgnamain betg preschentar en Svizra. El è vegnì onurà il 2021 cun il «Grond premi svizzer dals arts represchentativs / Anè HansReinhart» e mussa cun success dapi blers onns sias creaziuns acrobaticas, poeticas e tragicomicas en Svizra ed a l'exteriur. «Danse Macabre» è in toc d'ensemble, giugà d'ina truppa internaziunala, cun Mr. Skeleton en il center, l'alter ego da Zimmermann. Mr. Skeleton è in uman plain ravgia, ha plaschair dal discletg dals auters ed è elegant sco l'um cun la fautsch. E quel porta il num «Mort».
En quest toc vai per ils urs da la societad. Per quai che vegn numnà «rument» da quels che crain da star en il center: quai ch'è restà enavos, quai che vegn bittà, las restanzas; objects, animals, umans. La tribuna è ina deponia da rument gigantica. Qua vegni bain scuà regularmain, ma senza success visibel. Nossa societad bitta pli gugent davent che prender si. Abità vegn quest trid lieu dad umans cun existenzas desolatas. Mintgatant èn els in pau pli alleghers, mintgatant in pau pli desperads – e tranter els viva la mort sco sch'i na fiss nagut.
«Danse Macabre» è in maletg commuventà da noss temp: in saut dals morts sin ina deponia da rument. In toc critic, perdert, anguschant ed a medem temp fitg divertent. La saira è acrobatica en sia spertadad e virtuositad ch'ins vuless clamar sco en il circus «ah!»ed «oh!» Tuts sgolan tras l'aria sco sche la mort sautass cun la gravitaziun. En ils tocs da Martin Zimmermann abitescha la tragicomica – questa grondiusa furma dal teater e da la poesia, a la quala nus avain uschè pauc access surtut en Svizra tudestga. El è – sco ses Mr. Skeleton – da chasa cun ses art insanua en ina sfera intermediara che sa dapli da la vita ch'il bel cler di.
The Adventures of Mr. Skeleton – Martin Zimmermann / Augustin Rebetez
Il trenin d'orrur –in'installaziun cun 12 films curts
Questa occurrenza d'avertura plain slantsch stat a l'entschatta dal program da questa ediziun da l'Inscunter dal teater svizzer che sa deditgescha a las furmas da teater «intermediaras». Sper il toc da tribuna envidain nus in ulteriur act da Martin Zimmermann: il cub da Mr. Skeleton, u cun auters pleds, il trenin d'orrur da Mr. Skeleton. Quel è avert durant l'entir festival e mussa dudesch films curts politic-satirics che Martin Zimmermann ha realisà cun Augustin Rebetez durant il temp da corona. Tut las figuras, las bunas sco las nauschas, gioga Zimmermann sez. Gist Mr. Skeleton preschenta propostas co ch'ins pudess puspè metter en urden il mund: numnadamain cun engianar per ina giada quels che han per ordinari il suramaun.
Era qua vala: sche Vus giais en il cub cun nauscha luna, vegnis Vus en mintga cas anora cun buna luna – ed in fin clapragnar dals dents en l'ureglia che vegn ad accumpagnar Vus anc in pèr dis.
Ultra da quai ans legrain nus da pudair far la vernissascha dal tom MIMOS davart Martin Zimmermann e sia ovra - edì da la Societad svizra per la cultura da teater - en il rom da l'Inscunter dal teater svizzer.
(Julie Paucker, direcziun artistica)
Concept, reschia, choreografia
Martin Zimmermann
Cun
Tarek Halaby, Dimitri Jourde, Methinee Wongtrakoon, Martin Zimmermann
Musica
Colin Vallon
Dramaturgia
Sabine Geistlich
Tribuna
Simeon Meier, Martin Zimmermann
Collavuraziun artistica
Romain Guion
Concept tecnic tribuna
Ingo Groher
Costums
Susanne Boner, Martin Zimmermann
Glisch
Sarah Büchel
Tun
Andy Neresheimer
Direcziun tribuna
Roger Studer
Administraziun, diffusiun
Alain Vuignier
Communicacziun
Manuela Schlumpf
Producziun
MZ Atelier
Coproducziun
Kaserne Basel, Kurtheater Baden, Le Volcan, scène nationale du Havre, Les Théâtres de la Ville de Luxembourg, L’Odyssée — Périgueux, maisondelaculture de Bourges / scène nationale, Opéra Dijon, Theater- und Musikgesellschaft Zug, Théâtre de Carouge, Veranstalterfonds von Reso – Tanznetzwerk Schweiz – unterstützt durch Pro Helvetia, Schweizer Kulturstiftung, Zürcher Theater Spektakel