Davart l'Inscunter dal teater svizzer

L'Inscunter dal teater svizzer exista dapi l'onn 2014. El preschenta mintg'onn la fin da matg la lavur dal teater svizzer. Il festival che dura plirs dis sa basa sin in'iniziativa da l'Uniun da teaters svizzers ed il sustegn da l'Uffizi federal da cultura, da l'Institut internaziunal da teater ITI Suisse e da l'Associaziun d'artists teatrals independents. Il lieu d'occurrenza da l'Inscunter dal teater svizzer alternescha mintgamai tranter las regiuns linguisticas. Suenter las emprimas duas ediziuns a Winterthur (2014, 2015) ha el gì lieu a Genevra (2016), en il Tessin (2017), a Turitg (2018) ed en il Vallais (2019).

L'uniun Inscunter dal teater svizzer organisescha l'occurrenza mintgamai ensemen cun ils teaters ospitants dal lieu. Contribuziuns finanzialas survegn l'uniun da l'Uffizi federal da cultura, da las citads e dals chantuns organisaturs e d'ulteriuras fundaziuns e da promoturs. Cun sias occurrenzas singularas en differents lieus vul l'Inscunter dal teater svizzer d'ina vart porscher a las citads e regiuns respectivas in'invista en la lavur teatrala da l'entira Svizra e da l'autra vart esser cun ses caracter decentral in inscunter interlinguistic ed intercultural per la branscha.

En il center da l'occurrenza stat ina preschentaziun curatada da var set producziuns tant da teaters etablids sco era da la scena libra. Il curatori sa cumpona da schurnalists da cultura e persunas dal teater. Sia finamira è da metter ensemen ina selecziun da producziuns extraordinarias e remartgablas da tut las regiuns linguisticas. Plinavant organisescha l'Inscunter dal teater svizzer in program accumpagnant cun discussiuns da podium, lavuratoris e referats che tractan tematicas e dumondas actualas da la branscha. Dapi il 2017 ha lieu in forum ch'envida ina gruppa da giuvens teatrists sut 35 onns dad assister a la preschentaziun ed al program accumpagnant. Quests elements sustegnan l'aspect persistent e discursiv da l'Inscunter dal teater svizzer.

En il rom da l'Inscunter dal teater svizzer surdat l'Uffizi federal da cultura ils Premis dal teater svizzer. L'occurrenza independenta furma per regla il cumenzament e serva ils proxims dis sco grond magnet per las medias ed il public da la branscha.

Il 2020 giastescha l'Inscunter dal teater svizzer en il Grischun ed il Liechtenstein. Las occurrenzas dals 13 fin ils 17 da matg han lieu en noss teaters partenaris Teater da Cuira, Postremise Cuira e TAK Theater Liechtenstein.