Metamorphosen

Tge start fulminant da la nova cumpagnia dal Theater Basel cun ses reschissur e codirectur dal teater Antú Romero Nunes. Cun «Metamorphosen» preschenta l'ensemble gronda materia ch'è però nunusitada per il teater. L'ensemble sa fida oravant tut sin ina chaussa: sin la forza da l'interpretaziun.

Cun in nunditg plaschair d'improvisar sa bittan las acturas ed ils acturs en las intrigas ed ils dramas da la mitologia greca e preschentan – sa chapescha cun esser libers en lur interpretaziun ed en lur text – ils raquints dad Ovid. Quels cuntegnan en furma concisa ils pli gronds dramas e melodramas da l'istorgia da la litteratura. Las dieuas ed ils dieus grecs èn numnadamain tuttina fallibels sco nus: els èn vanitus, scuidus, ridiculs e vulan prender vendetga. En megliers muments èn els però er abels d'amar e d'esser empatics e solidarics. Els raquintan lur istorgias en tunicas dad aur, ma en sasez sa tracti da noss raquints e dramas. Ils gronds ed ils pitschens, da pli baud e dad oz.

Per la cumpagnia n'è nagina tuppadad memia tuppa e nagina melanconia memia melanconica – e nagin med teatral e gener memia ester. Quai che cumenza prest en il stil da Brecht en in rudè da sutgas finescha en in teater da chombra realistic. Sper l'entir patos da la tragedia greca cumpara tranteren la soap, igl ha lieu in concert da pop, il slapstick è en plaina flur e l'attatga isterica vegn cultivada en vers – cuntrarià cun in cor grec e musica en directa.

Igl è ina ristga remartgabla da gughegiar cun in ensemble furmà da nov in toc d'avertura uschè spectacular che na suonda nagin text da teater cler, che prenda temp e che cuntegna – sco ina saira da jazz – solos virtuos, ma che funcziuna en emprima lingia sco toc da band. Igl è deplorabel che la pandemia ha gist puspè franà quest'entschatta fulminanta. Ma ussa vegn per fortuna puspè fatg teater – ed uschia festivain nus quest'avertura cun in zic retard, ma betg a moda main festiva uss er en il rom da l'Inscunter dal teater svizzer.

(Julie Paucker, direcziun artistica)

• distrib

  Reschia
  Antú Romero Nunes

  Text
  secondo Ovid

  Cun
  Paula Beer, Barbara Colcerlu, Pascal Houdus, Vera Flück, Nairi Hadodo, Anne Haug, Michael Klammer, Marie Löcker, Annika Meier, Sven Schelker, Aenne Schwarz

  Musica live
  Tasti – Anna Bauer
  Drums – Michael Anklin
  Basso – Xavier Rüegg
  Cello – Ambrosius Huber
  Tromba – Anita Wälti

  Tribuna
  Matthias Koch

  Costums
  Victoria Behr

  Musica
  Anna Bauer, Johannes Hofmann

  Glisch
  Cornelius Hunziker

  Dramaturgia
  Kris Merken

  Tun
  Ralf Holtmann, Christof Stürchler

  Assistenza reschia
  Louisa Raspé

  Assistenza tribuna
  Daniel Felgendreher

  Assistenza costums
  Julia Brüllsauer

  Producziun
  Theater Basel

• link